潮濕o既天氣，食咖喱是一個去走濕氣的不錯方法！
o係咁多種咖喱里面，我最鍾意就係泰式黃咖喱，泰式咖喱用上香茅、檸檬葉同指天椒，辣得o黎帶點青香（唔意檸檬葉會覺得似.....洗潔精 >_<)。
今日呢個份量其實都夠三至四人食。
材料：
1. 冰鮮雞半隻（豪Ｄ就梗係用新鮮雞啦）但其實用急凍雞翼/雞脾，又或且係急凍雞扒斬件都可以，隨自己喜愛。
2. 薯仔一隻（大）/ 兩隻（小）
3. 蕃茄兩隻（中）
4. 洋蔥一隻（大）
5. 香茅兩支
6. 檸檬葉六至七塊
7. 指天椒四至五隻
8. 蒜頭四瓣
9.泰國黃咖喱醬一包
10.椰漿一盒/罐（小）
11. 椰糖半粒（一粒係好大粒下，在印尼雜貨店有得買），冇o既用片糖都得。
 |
| 所有材料 |
做法：
1. 將雞用糖、鹽、胡椒粉、酒、生抽、老抽、生粉同油醃起碼半小時。
2. 蕃茄、薯仔同洋蔥切件。
3. 香茅切段，最尾部份最好用刀壓幾下，等Ｄ香味可以出Ｄ。
4. 檸檬葉洗乾淨後都將Ｄ卒幾下，又係等Ｄ香味可以出Ｄ。
5. 指天椒切一開二。（準備好全部材料就開工啦）
6. 用一個最細的pan/煲落油用半煎炸形式去將薯仔處理先（咁可以防止炆雞時薯仔會散晒）。炸完「瓊」乾Ｄ油。備用。
7. 用個鑊落少少油加蒜頭起鑊，落雞爆炒下，再落埋洋蔥一起炒，加入咖喱醬炒，後加水落去煮，唔好一下落太多，寧願唔夠再落，一下子落太多水會淡晒。
8. 將所有香料同埋一半蕃茄一齊煮。
9. 大約煮十分鐘後，如果覺得唔多水可以再加，這時可以試一試味，後再椰糖一齊煮。
10. 辣到OK後再加埋薯仔一齊煮十五分鐘。
11. 再加埋剩底的蕃茄煮多五分鐘。
12. 再椰漿煮多兩分鐘，完成！
 |
| 泰式黃咖喱雞 |
